السبت، 13 مارس 2010

اقولكم HELLO







مساء الخير يا حلوين



هذي اول مرة اكتب فيها بس والله مو سوالفي كلش انا اصلا مالي خلق شي يالله اقوم من الفراش






بس الx مالتي ادش المدونات وتقرى شنو يكتبون الناس وكانت اتقولي عن مواقفهم وسوالفهم الحلوة فتشوقت اني ادش واشوف بنفسي ومنها






يكون عندي صداقات بكل مكان تدرون.. ماكو شغل اشوارانا ؟؟





اووه عفوا نسيت اعرفكم بنفسي:... معاكم اختكم اصيلة وعمري25 سنة ويتضح من العنواني اني خالة يعني سودة..






طبعا لما كنت صغيرة كنت كحلية بس الحمدلله كبرت وتمددت وفتح اللون اشوي :) فديت لوني والله!!





ما اقدر استغني عن لون الوكالة الاصلي ..المهم ماعلينا



خنأقولكم عن نفسي اكثر انا احب الرياضة وايد




لدرجة اني كنت رشيقة..



قريتوا الكلمة + التركيز عليها كنت رشيقة يعني من زمان ايام الدايناصورات





اما الحين فأنا مو رشيقة إلا انا ام الرشاقة من رشاقتي اقطر دهن






شسوي مليت من الرجيم وقطعت عن الرياضة وصرت بس أبلع الاكل



بس هالايام الحمدلله اشوي احسن من قبل قمت اخفف اشوي قايمة اليوم عشتو داشة المطبخ ميته يوع قلت اتريق شنو؟



قعدت اشوف الثلاجة والخزاين سويت ماي حار وقاعدة ادور شي لذيذ..شفت شاي بالحليب بالكراميل اشتهيته وشفت يمه ظرف شوربة سريع شوربة فطر بالكريمة فسال اللعاب من حلجي وبعدها قعدت اتخيل شنو الالذ اخرتها استقريت على جاي اخضر بالنعناع





عشان اهضم اشوي اللي في بطني لأني الله يسلمكم عتدي مشاكل بالهضم



حلم حياتي اروح كل يوم الحمام اكرمكم الله بس ما اقدر .. الله كريم




المهم رحت اغسل اهدومي انا وال x مالتي والاخت امسعبلة ونايمة نوم بالفراش


وطبعا بس اخلص الغسيل لازم اروح اتسبح والمقطع اللي اكره فيه سالفة السباحة شي واحد واهوة شعري


اقعد 100 سنة امشطه واستشور فيه اففف معاناه










والنتيجة اخس بعد الاستشوار اصير هوولة







ياحلاتي وانا ياهل ما اتعب الله يعافي الوالدة كانت اجهزني واتمشطني واتضبطني ..

ياحلاتي وانا صغيرة تختوخة وامصرقعة بس يطلع مني شي مفييد




كنت احب اروح الروضة والعب بس مشكلتي اهناك لما اشوف البنات شعرهم مفلول اروح وافتح شعري عبالي شعر باربي
ولما تاخذني امي من الروضة تنصدم واتبطل عيونها واتقولي : ليش جذي يا يمة انا مو رابطته ليش تفتحينه؟؟










اقولها بكل براءة : ثلت الثباثات علثان اسوي ثعلي مثل البنات ماما


وطبعا الوالدة تبتسم وتربطه مرة ثانية

بس طبعا انا ما اتوب اسويها كل يوم وكل يوم امي اتنبهني وانا ولا على البال..


مع اني كنت خوش وحدة وامشي يم الطوفة




ومع اني كنت صغيرة بس احب اتكشخ وكله ابوق اغراض اختي الكبيرة والبسهم







وطبعا اطراقات فيني لين افصخ بس افا عليكم و انا استلمها عض وتقرص عبالها اليفة انا خخخخ

انا اخليكم الحين وانشالله بعدين اقولكم عني وعن يومياتي اكثر باي

هناك 5 تعليقات:

alzqrtya يقول...

لووول اما الصور عجيبه
تعالي البيت وانا اعملج :/ فيني طقه ودي اطق احد لووول

الدانة يقول...

ياصباح الضحك والوناسة :)
ياعسى ربي يفرحج بالصحة والعافيه مثل ماونستيني ببوستج اليوم :)
بصراحة قعدت اضحك جدام الاوادم لاشعوريا وعيوني تدمع .. يابعد قلبي والله ترى انا اموت باللون الكحلي , مزاجي يضرب عليكم ساعات ..
اشكرج جدا ومن كل قلبي على بوستج اليوم
واذا بتستمرين بالfun هذا صدقيني راح اتابعج كل يوم .. محتاجة اضحك
صديقتج الجديدة
الدانة

ala9eela يقول...

* ههههه زوزو شسوي بعد مو يقولون الاعتراف بالحق فضيلة؟
عموما مشكورة على مرورج الحلوو يا إكسي العزيزة

* هلا وغلا صديقتي العزيزة دانة يا عسى دوم هالضحكةويارب ما تفارق شفاتج..ويشرفني اتنوريني كل ماحبيتي يا الغالية.

عبــ قصتي ير يقول...

قوة
عجبتني الصور وايد
استانست وانا اقرى

وتحياتي
عبورة

ala9eela يقول...

هلا وغلا عبورة وانا استانست اكثر بوجودج في بلوقي حياج الله حبيبتي